පාර්ලිමේන්තු මැතිවරණය වෙනුවෙන් ඉදිරිපත් වෙන ජාතික ජන බලවේගය දිස්ත්‍රික් 22 සඳහාම අපේක්ෂකයන්ගේ නාමයෝජනා අත්සන් තැබීම අවසන් කර තිබේ.
අග්‍රාමාත්‍ය හරිනි අමරසූරිය කොළඹ දිස්ත්‍රික්කය නියෝජනය කරමින් මෙවර මැතිවරණයට ඉදිරිපත් වී තිබේ. ගියවර මහ මැතිවරණයේදී හරිනි අමරසූරිය ඉදිරිපත් වූයේ ජාතික ලැයිස්තුවෙනි. අමාත්‍ය විජිත හේරත් ගම්පහ දිස්ත්‍රික්කය නියෝජනය කරමින් මෙවර මැතිවරණයට ඉදිරිපත් වී ඇත.
මෙවර මැතිවරණය සඳහා විවිධ ක්ෂේත්‍රයන් නියෝජනය කරමින් ශක්තිමත් කණ්ඩායමක් ඉදිරිපත් කර තිබෙන බවත්, ජාතික ජන බලවේගයට බහුතර බලයකින් යුත් ශක්තිමත් පාර්ලිමේන්තුවක් පිහිටුවීමට හැකි බවත්, ජාතික ජන බලවේගයේ ජාතික විධායක සභික, ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතා පැවසීය.
ජාතික ජන බලවේගයේ මහ මැතිවරණ ජයග්‍රහණය තහවුරු බවත්, අමාත්‍ය මණ්ඩලය පිහිටුවීම සහ පාර්ලිමේන්තුවේ නීති සම්පාදන කටයුතු සඳහා සුදුසුකම් ඇති පිරිසක් මැතිවරණයට ඉදිරිපත් කර තිබෙන බවද ඔහු ප්‍රකාශ කළේය.
මෙවර මැතිවරණය සඳහා ඉදිරිපත් කර තිබෙන කණ්ඩායම පිළිබඳව වගකීම භාර ගන්නා බවත්, ජනතාවට විශ්වාසයෙන් මනාපය ලබා දිය හැකි කණ්ඩායමක් ඉදිරිපත් කර ඇති බවත් ඔහු කීවේය. කාන්තා, තරුණ, සිංහල, දමිළ, මුස්ලිම් හා විවිධ වෘත්තීයවේදීන්, දේශපාලන අත්දැකීම් ඇති අය මැතිවරණයට ඉදිරිපත් කර ඇති බවද ඔහු ප්‍රකාශ කළේය.
ජාතික ජන බලවේගයේ ප්‍රධාන ලේකම් නිහාල් අබේසිංහ මහතා පැවසුවේ, වර්තමානයේ ශ්‍රී ලංකාවේ ශක්තිමත්ම දේශපාලන ව්‍යාපාරය ලෙස මෙවර මැතිවරණයට ඉදිරිපත් වන බවයි. එමෙන්ම ඔහු සඳහන් කළේ, අත්සන් තබන ලද නාමයෝජනා පත්‍ර අද (10දා) සහ හෙට (11දා) දිස්ත්‍රික් තේරීම් භාර නිලධාරීන් වෙත භාරදෙන බවයි.
