ඉදිරි පාර්ලිමේන්තු මැතිවරණයට සූදානම් වීම සඳහා රජයේ මුද්‍රණ දෙපාර්තමේන්තුව මූලික මුද්‍රණ කටයුතු ආරම්භ කර තිබේ.
රජයේ මුද්‍රණාලයාධිපතිනී ගංගා කල්පනී ලියනගේ නිවේදනය කළේ, ගැසට් පත්‍ර, අයදුම් පත්‍ර සහ අනෙකුත් අත්‍යවශ්‍ය ලියකියවිලි මුද්‍රණය කිරීම මූලික අදියරට ඇතුළත් බවයි.
නොවැම්බර් 14 වැනිදා පැවැත්වීමට නියමිත පාර්ලිමේන්තු මැතිවරණයට සතියකට පෙර මුද්‍රණ කටයුතු සියල්ල අවසන් කරන බවට ඇය පැවසූවාය.
නාම යෝජනා කාලය අවසන් වීමෙන් පසු ඡන්ද පත්‍රිකා සහ නිල ඡන්ද දැන්වීම් පත්‍රිකා මුද්‍රණය කිරීම ආරම්භ කෙරේ.
පාර්ලිමේන්තු මැතිවරණය පැවැත්වෙන්නේ 2024 ඡන්ද හිමි නාමලේඛනය පදනම් කරගෙනයි.
නාම යෝජනා කාලය ඔක්තෝබර් 4 වැනිදා ආරම්භ වී ඔක්තෝබර් 11 වැනිදා මධ්‍යහනයෙන් අවසන් වන බව අතිවිශේෂ ගැසට් නිවේදනයක සඳහන් වේ.
අලුතින් තේරී පත් වූ පාර්ලිමේන්තුව නොවැම්බර් 21 වැනි දින රැස්වීමට නියමිතය.
