දරුවන් දසදහසකට උග්‍ර මන්දපෝෂණය

වයස අවුරුදු පහට අඩු දරුවන් 10,323 දෙනෙකු උග්‍ර පෝෂණ ඌනතාවයෙන් පෙළෙන බව පෝෂණ මාසය නිමිත්තෙන් 2024 වර්ෂයට අදාළව පවුල් සෞඛ්‍ය සේවා කාර්යාංශය මගින් නිකුත් කොට ඇති වාර්තාවේ සඳහන් වේ.

උග්‍ර පෝෂණ ඌනතාවයෙන් පෙළෙන වයස අවුරුදු පහට අඩු දරුවන් වැඩි ම පිරිසක් වාර්තා වන්නේ ගම්පහ දිස්ත‍්‍රික්කයෙන් වන අතර එම සංඛ්‍යාව 994කි.

උග්‍ර පෝෂණ ඌනතාවයෙන් පෙළෙන දරුවන් 930ක් කුරුණෑගල දිස්ත්‍රික්කයෙන් ද, 629ක් අනුරාධපුර දිස්ත්‍රික්කයෙන් ද, 622ක් නුවර දිස්ත්‍රික්කයෙන් ද, 619ක් ගාල්ල දිස්ත්‍රික්කයෙන් ද, වාර්තා වී ඇති බව එම වාර්තාවේ සඳහන් වේ.

මෙරට වයස අවුරුදු පහට අඩු දරුවන් 25,269 දෙනෙකු මන්දපෝෂණ ඌනතාවයෙන් පෙළෙන බව ද මෙකී වාර්තාවේ සඳහන් වේ.

මන්දපෝෂණ ඌනතාවයෙන් පෙළෙන අවුරුදු පහට අඩු දරුවන් 2,550 දෙනෙකු ගම්පහ දිස්ත්‍රික්කයෙන් ද වාර්තා වී ඇති අතර කුරුණෑගල දිස්ත්‍රික්කයෙන් වාර්තා වී ඇති ළමයින් සංඛ්‍යාව 2,245කි.

මහනුවර දිස්ත්‍රික්කයෙන් ළමයින් 1,578 දෙනෙකු සහ අනුරාධපුර දිස්ත්‍රික්කයෙන් ළමයින් 1,340 දෙනෙකු වාර්තා වී ඇති බව ද මෙම වාර්තාවේ සඳහන් වේ.

එමෙන් ම, මෙරට අවුරුදු පහට අඩු වයසට සරිලන ලෙස බර අඩු දරුවන් 215,386 දෙනෙකු වාර්තා වී ඇති අතර මින් වැඩි ම දරුවන් සංඛ්‍යාවක් වාර්තා වී ඇත්තේ, කුරුණෑගල දිස්ත්‍රික්කයෙන් වන අතර එම සංඛ්‍යාව 17,701කි.

වයසට සරිලන බර අඩු දරුවන් අතර 15,994ක් ගම්පහ දිස්ත්‍රික්කයෙන් ද, 15,376ක් මහනුවර දිස්ත්‍රික්කයෙන් ද වාර්තා වී ඇත.

එමෙන් ම, මෙරට අවුරුදු 5ට අඩු වයසට සරිලන ලෙස උස අඩු දරුවන් 133,538 දෙනෙකු වාර්තා වී ඇති බැව් පවුල් සෞඛ්‍ය කාර්යාංශය මගින් නිකුත්කොට ඇති වාර්තාවේ සඳහන් වේ.

මින් වැඩි ම දරුවන් සංඛ්‍යාවක් වාර්තා වන්නේ, නුවරඑළිය දිස්ත්‍රික්කයෙන් වන අතර එම ළමයින් සංඛ්‍යාව 11,677කි.

වයසට සරිලන උස අඩු දරුවන් 10,177 දෙනෙකු කුරුණෑගල දිස්ත්‍රික්කයෙන් වාර්තා වී ඇති අතර නුවර දිස්ත්‍රික්කයෙන් වාර්තා වී ඇති ළමයින් සංඛ්‍යාව 10,093 දෙනෙකි.

එමෙන් ම, අවුරුදු පහට අඩු අධි බර දරුවන් 6,223 දෙනකු වාර්තා වී ඇත.