“2024 ශ්‍රී ලංකා ක්‍රීඩා සැනකෙලිය ගුවන් හමුදාපති කුසලාන රග්බි තරගාවලිය කොළඹ තුරඟ තරග පිටියේදී “
ඩයලොග් ආසියාටා ආයතනයේ ප්‍රධාන අනුග්‍රහය යටතේ ක්‍රීඩා හා යෞවන කටයුතු අමාත්‍යාංශය, සංචාරක අමාත්‍යාංශය සමග එක්ව සංවිධානය කරනු ලබන ශ්‍රී ලංකා ක්‍රීඩා සැනකෙලිය 2024 අගෝස්තු මස 16 වන දින සිට 2024 අගෝස්තු මස 18 වන දින දක්වා කොළඹ තුරඟ තරග පිටියේදී පැවැත්වීමට නියමිතය.
ක්‍රිකට්, රග්බි, පාපන්දු, වොලිබෝල්, නෙට්බෝල්, හොකී සහ පැසිපන්දු යන කණ්ඩායම් ක්‍රීඩා හතක් හරහා ක්‍රීඩක ක්‍රීඩිකාවන් 3,000කට අධික සංඛ්‍යාවක් මෙම තරගාවලිය සදහා සහභාගී වීමට නියමිතව ඇත.
2024 ශ්‍රී ලංකා ඩක්‍රීඩා සැණකෙලියේ සුවිශේෂි තරගාවලියක් වන ශ්‍රී ලංකා ගුවන් හමුදාව විසින් සංවිධානය කරනු ලබන ගුවන් හමුදාපති කුසලාන රග්බි තරගාවලිය 2024 අගෝස්තු 16 වන දින කොළඹ තුරඟ තරග පිටියේදී ආරම්භ වීමට නියමිතය.
මෙවර තරගාවලියට CR & FC, හැව්ලොක්ස්, CH & FC, යුධ හමුදාව, නාවික හමුදාව, ගුවන් හමුදාව, සහ පොලිස් කණ්ඩායම් ඇතුළුව ‘A’ ශ්‍රේණියේ පිරිමි ක්‍රීඩා සමාජ මෙන්ම ‘A’ ශ්‍රේණියේ කාන්තා ක්‍රීඩා සමාජ ඇතුලුව යුධ හමුදාව, නාවික හමුදාව, ගුවන් හමුදාව යන කණ්ඩායම් සහ CR & FC කණ්ඩායමද සහභාගී වීමට නියමිතව ඇත.
මෙම තරගාවලියට පාසල් මට්ටමේ නැගී එන දක්ෂතා ඇති ක්‍රීඩකයින් පෝෂණය කිරීමේ අරමුණින් පාසල් 16න් පහළ කාණ්ඩයම්ද ඇතුළත් කර තිබේ.
මේ වන විට පාසල් 14ක් විසින් සහභාගි වීම තහවුරු කර ඇති අතර මෙම පාසල් අතරට ඉසිපතන විද්‍යාලය, ශාන්ත පීතර විද්‍යාලය, ශාන්ත තෝමස් විද්‍යාලය, ශාන්ත ජෝසප් විද්‍යාලය, තර්ස්ටන් විද්‍යාලය, විද්‍යා විද්‍යාලය, සහිරා විද්‍යාලය, විද්‍යාර්ථ විද්‍යාලය, ධර්මරාජ විද්‍යාලය, ශාන්ත අන්තෝනි විද්‍යාලය, ඩී එස් සේනානායක විද්‍යාලය, වෙස්ලි විද්‍යාලය, ශාන්ත තෝමස් විද්‍යාලය සහ කිංග්ස්වුඩ් විද්‍යාලය ඇතුලත් වේ.
